6 اكتوبر وضمور الحلم

تفكيري ف المناسبات الوطنية من زمان تفكير سطحي شويتين
دايما باربطها بالأجازات
ومن يجى شهرين كنت باشوف 6 اكتوبر ده هيوافق يوم ايه ف الاسبوع عشان اطمن انه مش جمعة ولا سبت وكنت مبسوطة اوى لما لاقيته ف نص الاسبوع واتفقت مع اصحابي اننا نتقابل .....أجازة بقي
أووووم إيه ............
ينزل قرار إدارى عندنا ف الشغل انه مش أجازة
قريت القرار ودخلت للمدير قلتله هو انتو وش إحتفال بالعبور بردو ؟
انتو يا دوب تحتفلو بالنكسة
وسبته مبحلق ف الفراغ ومشيت
واديني سهرانة اجهز لشغل الأجازة المأسوف عليها
انتبهت للراديو اللي شغال جنبي دايما على نجوم اف ام و أحمد يونس المذيع بيقول اننا بنفتكر الجيل بتاع 73 ببطولاتهم والتضحيات اللي قدموها وأنهم دخلو التاريخ من أشرف ابوابه و ابتدت الاغانى الجميلة بتاعة ذكرى الانتصار تتذاع
افتكرت كتاب عندى حلو اوى اسمه الناس والحرب كانت اتكلمت عنه كتير نوارة نجم ومنها عرفته ووقعت ف غرامه فعلا قد إيه الناس دول عملو حاجات تتصنف ضمن المعجزات بغض النظر انها ضاعت خلاص ,بإدينا وللا غصب عننا ,برضانا وللا بقهرنا ,مش مهم أهى ضاعت
وجبت الكتاب
وقعدت اقلب فيه والمذيع بيقول لازم جيلنا إحنا كمان يعمل حاجة تتكتب باسمه ف التاريخ و ولادنا يفتكرونا بيها ويفخرو بينا وبإنجازاتنا احنا كمان
وبيطلب مقترحات الناس وافكار المبادرات اللي هاتدخل جيلنا التاريخ بقي ونبقي راس براس مع أبطال أكتوبر
وإذ بكل الرسايل والمكالمات تقريبا ما تخرجش عن موضوعين
حرب الزبالة و حرب التحرش
تقلصت مشاريعنا القومية وطموحاتنا من العبور للنصر للعبور من صفيحة الزبالة

لاء صحيح هاندخل التاريخ
ده إحنا جيلنا غلبان أوى
يا زين ما خلفتي وربيتي يا زينب


قفلت الكتاب وشلته مكانه وقلت ابدأ بنفسي و ألحق باب التاريخ عشان بيقفلوه بسرعة ولميت ورق الشغل اللي قطعته من غيظي قبل ما التاريخ يبتدي يسجل

وكل 6 اكتوبر وانتو طيبيين

عيد سعيد ....مين سعيد ده ؟

تقبل اللله صيامنا وقيامنا وصالح اعمالنا

غفر الله لنا تقصيرنا وتقبل منا قليل عملنا

كل سنة والكل بخير
ويعود علينا واحنا إلى الله أقرب وعلى طاعته أدوم

عفريتة صلاح جاهين

مالهاش دعوة بالعالم السفلي وللا بشمهورش والسكة دى خالص
أنا قصدى النجاتيف ايوة النجاتيف بتاع صورة صلاح جاهين واللي بروزها بصوت عبد الحليم وصورلنا فيها بلد بجد

على قد أحلامه ما كانت عظيمة الصورة كمان طلعت حلوة اوى
وده طبعا بمناسبة ان مصر اليوم فى عيد هييه واللي اكيد اهم حاجة فيه انه اجازة

نيجى بقي لحكاية العفريتة بقي احنا لو اتخيلنا عم صلاح جاهين موجود ف الزمن المهبب ده اذا افترضنا اصلا انه كان يقدر يتحمل حال الدنيا المايل ده كان زمانه اعاد صياغة أحلامه ف صورة وخلاها كوابس واقعية ف عفريتة

رجاء مراجعة الاغنية وقلب كل كلامها عشان تبقي واقعية اصلي دورت عليها مش لقيتها كاملة فا حسب ما افتكر بقي

فى صورة صورلنا الشعب فرحان تحت الراية المنصورة اما بقي ف العفريتة الشعب قرفان والراية مقهورة بعد ما بقت على وش تورتة يقطعوها الصهاينة ويطفحوها

اما الزمان فوقعنا من حساباته وبعدنا عن بعض كمان وسواء كنت ف الميدان او براه فشكلك هايطلع بهتان ف العفريتة
خضرة مسرطنة وماية ملوثة وشمس لسة زى ماهى عفية عشان مش طايلينها بس وقبة سما بالسحابة السودا مستخبية ومعالم ذل وعبودية ونسايم خيبة قوية ومداين صاحية الفجرية بجراكن تدور على بق ماية دى بلدنا مصر المنوفية فى عفريتة اخر بتنجااااااان

نلاقي كمان انه بقي على مدد الشوف بدلة وبدلة كبروا بفلوسنا وقروضنا
المدخنة بقت قايدة بنار عمال المعاش المبكر تحتها زى ما يكون كدة حديد عز واسمنت راتب
وقدامه من أغلى ولادنا عامل ومهندس طهقان شبان والشبان فى بلدنا م البحر بيطلع غرقان

كلنا هنا ف العفريتة زمايل من اصغر طفلة بجدايل على نانسى وهيفا بتتمايل
للفلاح ابو ديون تقايل للواعظ حافظ مش فاهم القرآن
للجندى الأسد اللي شايل على كتفه مسؤلية نفسه عشان لو اتنش ع الحدود مالوش دية بعد مااتعذروا ف قرشين وباعوا درع الاوطان وعملوا بتمنه منتجع شارم

وبعيد عن العين لاكين ف العفريتة اوضح ناس ناس تحت حر الجبال والقلب تعب خلاص يخرجو الغاز من هنا يروح اسرائيل من هنا
بلاش بقي موضوع الدكاترة راجع اعتصامات واضرابات الدكاترة والعلما راجع مشاكل بتوع الطاقة الذرية
والمعامل ما اعرفشي عنها حاجة والاساتذة راجع امتحانات الكادر
بقي كله بقي من الشعب العاطل حتى اللي بيشتغلوا
نيجى بقي للشباب السكر اللي على مكاتبهم ايوة بتوع العقود المؤقتة يبقي وضع طبيعي جدا انهم يطلعوا روح اللي يعامل

كفاية كدة انا مش فاكرة ليها باقي وللا خلصت
المهم دلوقتى ان صلاح جاهين مات بدرى ربنا بيحبه ما شافشي اللي احنا فيه ولا شاف اللي عملته ف كلامه

اجى بقي لأحلى حاجة قريتها بمناسبة عيد الثورة ف الدستور الأسبوعى
س .....قبل 53 سنة وفى عيد الثورة قال عبد الناصر بتحدى (هنبنى السد ولو بالمقاطف .)..ترى ماذا تبقي من هذه العبارة ؟؟

ج ..... المقاطف

ماحدش يفهمني غلط

جالك أوان وعرفت مشى الجنايز

كيف شفتها يا عبد رب اللذايذ ؟؟

الفقد

تمر عليك أوقات تتخيل أنها أصعب أوقات حياتك وأنك لن تعيش اقسى منها
تصبر نفسك بأنها حتما ستنتهى لتعود لأيامك المعتادة مرة أخرى ولن يبقي منها إللا ذكرى بعض المرارة المحتملة .
تسمع عن الفقد وتتعامل مع ألمه من بعيد وإذا اصاب أحد أعزائك تعتقد أن ما تشعر به من ألم هو منتهى الألم وأن الحزن الذى لازمك لعدة أيام لا يساويه حزن بعدها تعود الحياة إلى ما كانت عليه وتعود أنت إلى نفسك معتقدا أن ما شعرت به حينها هو ما سوف يصيبك عند كل محنة فقد جديدة
تسير بك الأيام وأنت تظن انك تعرف وجع الفقد وتألفه لتصحو يوما وتكتشف وكأنك تتعرف عليه لأول مرة وأنك دخلت محنة فقد لا يقدر عقلك على فهمها فهى أقسي مما تحتمل ،تقنع نفسك أنه كابوس وستفيق منه حتما فتمر أيام وأسابيع وشهور ولا ينتهى
تتبدل بعدها تفاصيل الحياة لم تعد أبدا كما كانت حتى ملامح الناس فى عينك لم تعد كما كانت من قبل
تتغير أحلامك رجائاتك وحتى مخاوفك
تجد كل التفاصيل الصغيرة حولك تدعوك للكلام عنه وإذا نبهك أحدهم لضرورة التوقف عن ذلك لتعطى فرصة السلوان لمن حولك تجد نفسك تتكلم كلامه بطريقته تحب ما أحب وتكره ما كره وتتصرف كما كان يتصرف كأنك قررت ان تلغي نفسك لتصل العمر القصير الذى انتهى
يتملكك الرعب كثيرا أن يكون ذلك عدم رضا بقضاء الله فتحاول العودة إلى حياتك مرة أخرى فيأخذك شعور قاسي بالذنب لمجرد التفكير بعودة الحياة كما كانت لتظل ممزقا بين ذنب ما صرت إليه وذنب تركه واستئناف الحياة التى كانت قبل الفقد

إيه رأيك ؟

إيه رأيك يا حسني أظن ما أنت مبسوط دلوقت ،زمانك متكيف ع الأخر أهو بدل ما تتعب نفسك وتهدد اللي يعدى م الحدود انك تقطع رجله أهو حبايبك عملوا الواجب وقطعوه كله مش رجله بس
ما رضيتش تفتح بوابة السجن من عندك عشان يجيبوا أكل ودوا لولادهم بفلوسهم مش شحاتة بس برضو قلبك الحنين ما طاوعكش تسيبهم جعانين قلت الموت ليهم رحمة صح ؟
قللي صحيح ايه رأيك ف منظر الجثث المرمية ..عجبك ؟ أكيد عجبك
طيب نفسي أعرف كان إيه إحساسك وانت بتتفق مع المجرمة ليفني ع المجزرة دى ....كنت متردد ولا متحمس وفرحان ؟ ........مااتهزيتش ؟
أال كرامتك نقحت عليك أوى لما قامت مظاهرات ف ايران وسوريا تشتم ف سياستك ومشاركتك المخزية ف الحصار اتنحررت أوى واستدعيت السفرا ........طيب ودلوقت كل أللي طلع منك تطلب من شركائك ضبط النفس ورجالتك الاغبيا يقولوا أدى جزاء اللي مايسمعش كلمة ماما تقولها هالبت ما أنت قرحان أوى بقي علي كدة
طيب ايه رأيك وإحنا بنتشتم بسببك من كل واحد عنده ضمير ف الدنيا وللا إيه رأيك واحنا مكسوفين من اننا مصرين بسببك
ماقبلتش تكون جنبك إمارة إسلامية بس طبعا قابل دلوقت تكون جنبك مقبرة جماعية
فتحت المعبر دلوقت ليه ؟؟؟ إيه ؟ماينفعش يعدى منه أكل ودوا بس ينفع يعدى منه نعوش بس ؟
بس ولا يهمك من اللي بيحسبن عليك أنا عارفة انك مش هاتزعل منه ولا هتخاف انت أصلا ماتعرفش ربنا ولا بتعمل ليوم لقاه حساب وأكيد مش هاتتأثر لما أقول لك .....اتفووووووووووووووووووووو

ورد أتينا

صباح الخير على الورد اللي فتح فى جناين أتينا
وقال كانوا بيقولوا إن المصرين واليونانين فيهم كتير من بعض
لالالالالا خالص دول طلعوا عالم ورق يا راجل
إنما إحنا ؟..........حمول حمول يعني
حتة واحد يادوب الشرطة هناك قتلته قامت الدنيا مظاهرات واشتباكات لسابع يوم لأوالغريب إنهم بيحققوا بتهمة القتل العمد ومش مكفبهم دول بيطالبوا بإستقالة الحكومة والطلبة ف الشوارع بتضرب ف الشرطة لأوعميد الجامعة مانع دخول الشرطة الحرم الجامعي أصله منتخب والعياذ بالله
كل ده عشان واااااااااااااحد عالم هايفة صحيح
إنما إحنا بقي ناس جامدة جامدة ولابيفرق معانا
حد يعد معايا
إشي قتيل المحلة وقتيل المنصورة إشي ف العمرانية وإمبابة والفيوم وأسوان و سينا وسوهاج
وبالعدل الصراحة الشرطة ماعندهاش تفرقة عنصرية
يعني مسلمين ومسيحين تلاقي
رجالة وستات وكمان حوامل
كبار وأطفل وكمان أجنة .......عدل عدل الصراحة
حد نطق ولا نزل الشارع ولا جاب سيرة اسقاط حكومات ولا محاكمات ..مفيييييش
إحنا بتوع الكلام ده بردو ؟