بقي لونها بمبي

شم نسيم بقى وكل سنة وانتوا طيبين أول ما سمعت سعاد حسني دلوقت بتقول الحياة بقي لونها بمبى قعدت أدور إيه فى حياتنا لونه بمبي كدة ومبهج ...............صراحة مالاقيتش حاجة غيرش كله غامق .......اطشييييعة ما علينا
قلت مافيش غير إني ألون أى حاجة حوليا بما أني مش هلون بيض عشان مش باحب أكله يبقى مافيش غير المطرح ده .ندهنه لون مزهزه كدة يبعث على التفاؤل (مش عارفة منين بس ده الموجود )هو صحيح فاقع شوية بس يمكن يحووق صحيح المدونة بقت بمبي بس الحياة ف عنيا لونها مش بمبي ولا أنا جنب حد ولا حد جنبي ...............

الأهلى فى طنطا ..(تيييت)

• كنت راكبة تاكسى ومشغولة ف ترتيب الأوراق اللى معايا عيني لفتت للشباك لاقيتنا لسة ف ميدان ستوتة (إيه ده إحنا لسه هنا ؟ هو أنا راكبة جمل ؟) ......................
  إيه الزحمة دى فيه إيه يا أسطى ؟
  
  زى مانتي شايفة يا أبلة الطريق واقف
  
  أيوة ليه بقى ؟
  والله منا عارف أنا مادخلتش من هنا النهاردة .ربنا يستر دى باينها حادثة ....
  ...
  الطريق بيمشي ببطيئ
  
  اه فيه زحمة كبيرة قدام عند الأتوبيس اللى واقف بالعرض هناك ....
  
  قعدت أدعي يكون حاجة بسيطة وخلاص هابتدى أعيط إذ بالراجل ينفجر ....
  
  الله يخرب بيوتكو ولاد (تيت )
  
  ايه ده فيه إيه؟
  
  قال دول طلعوا بتوع الكورة لاعيبة الأهلى نازلين من فندق عرفة يركبوا الأتوبيس فا الناس اتلمت عليهم عشان يتفرجوا عليهم هم كدة ناس (تيت )مايتلموش إلا على الهايفة يا لاعيب كورة يا رقاصة
  
  
  هو الأهلى جاى طنطا ليه ؟
  
  يلاعب بلدية المحلة خا يفين على ال(تيت )بتوع الأهلى وماودوهمش المحلة بعد ماخربوها ولاد ال (تيت )بتوع الداخلية فاجابولهم لاعيبة المحلة هنا أأمن
  
  بس ده الناس مش كلها شبان صغيرين ده فيه منهم رجالة كبار .
  
  يا أبلة ماهو أصلها حكومة (تيت )وريس (تيت ) بيلهوا العالم فى الفوارغ عشان الناس تعمى عن بلاويهم وتبقى الكورة أهم عند النفر من دول من أكل عيشه دى سياسة بنت ستين (تيت ) اه هو اللى عايز ينفع ف البلد ال (تيت )دى يا يطلع بتاع كورة ياإما حرامى وأهو الشباب اللى زى الورد ولا حاجة ده انا إبني كان من الأوائل وكان المفروض يبقى وكيل نيابة بس أجيب منين الألافات للباشا الواسطة أهو بيرص شيش فى الغردقة دلوقت.. أنا اللي أستاهل ضرب ال (تيت ) علام إيه اللي علمتهلهم ماكنت طلعت الواد لاعيب كورة والبنتين رقاصات ما كانش ده بقى حالهم بس قولي يا رب رجالة المحلة يقطعوا ولاد ال(تيت )دول قال جايين يحتفلوا بالدورى و البلد فيها عزا ..............................
  
  جه ف بالي أغنية الأفراح البلدى اللى فيها كوبليهين واحد رمز المقاومة والصمود والتانى رمز الخضوع والنفاق
  الأولاني بيقول الأهلى والمحلة .....إن قالك هاتي بوسة إدييه ب غطا الحلة
  والتانى الأهلى والزمالك............ إن قالك هاتي بوسة إدييه ومشي حالك
  أما صحيح حاجة (تيييييييت)

شدى الحيل يا محلة

المحلة مقفولة متحاصرة منعوا الناس من دخولها ...........ليه العسكر عملوا فيها إيه أكتر من اللي نعرفه ؟أنا خايفة عليها أوى ربنا يستر
معظم المتضامنين مع المحلة خدوا موقفهم من منطلق وطنى وإنسانى شافوها أكتر مكان دفع تمن قرار الإضراب ،وشافوا أهلها ناس جدعان ما إرتضوش الإهانة وعلموا ع العسكر وهزئوهم وكدبوا التهم المتلفقة من النظام ليهم بالتخريب
. أنا متفقة معاهم ف كل دة بس كمان فيه سبب شخصي وهو إرتباطي بالمكان بحكم قرب المسافة وأن ليا أصحاب كتير هناك الشوارع اللي بلطجية الأمن خربوها دى أنا مشيت فيها كتير وليا فيها ذكريات حلوة ......لما كنا قاعدين نتابع صور التخريب ع النت وف التليفزيون بابا قعد يسألني الصورة دى فين ودى فين ؟ وأنا أإرد عليه دى الشوارع اللي ورا شريط القطر وده ميدان الشون ودى عند بنزايون ......والشارع ده فيه بيت علا صاحبتي والدكان المتكسر ده البقال اللي كنت باتكلم من عنده ف التليفون ويقوللى انتي دايما مستعجلة كدة ؟ .........
ماما تقول منهم لله دى المحلة فاتحة بيوت ومجهزة عرايس .
انا عارفة ان ده كان لازم يحصل ، طبيعي أن الناس تنفجر ف الزمن الهباب ده بس تجبر العسكر كان إجرامى ولما يحصل ده ف مكان تعرفه وبتحبه بيبقى مؤلم

سلامتك يا محلة

الولد مات ...............يستاهل
إيه اللى طلعه البلكونة يكشف عورة النظام ؟
وبعدين هو اللى حط دماغه ف طريق الرصاص
بيقولك ماااااااااات........................
.وماله خليه يتربى عشان يحرم يبص تاني على أسياده
وبعدين دى أعمار هانكفر يعنى ؟
طيب بقية القتلى اللى الناس شافوهم ف الطريق وف مستشفى المنصورة
لا دى إشاعات مغرضة هدفها الإثارة وتهيج مشاعر العامة (ده على أساس أنهم مستنينكو )
طيب التخريب والنهب اللى دمر البلد
.......أيون دى بقى بسبب دعاة الأضراب والفوضى اللى وراهم جهات مشبوهة و جماعات محظورة (أصلهم زادوا )
طيب مين المسؤول عن كل ده ؟ أنتو طبعا يا شعب همج غير ناضج ولا يعرف طرق الإعتراض الراقى
طب علي قد عقلي بقى و واحدة واحدة
تبعا لمنطق الإحتمالات وفرض الفروض كل شيئ جايز
ممكن يكون الأمن هو اللى جاب البلطجية ودى تبقى جريمته المباشرة
وممكن البلطجية دول من مهمشين المحلة اللى بيعانوا من الفقر والبطالة وإنعدام الخدمات .. ودى بردك جريمة مباشرة للنظام
وممكن يكون إتحاد نقابات عاطلي وبلطجية مصر اتفقوا سرا على المقابلة هناك واخترقوا كردون الأمن ودى كمان جريمة مباشرة للنظام
وممكن الناس الغلابة من كتر الشقا وطناش الحكومة وضغطها عليهم تحولوا لمخربين و كمان دى جريمة النظام
وجايز البلطجية دول أفراد عصابة أنا زعيمتها وبعتهم المحلة عشان أبوظ سمعة الأمن الطاهرة مستغلة حبه ليا وف الحالة دى تبقى جريمة النظام
وبعدين إيه الشوطة بتاعة شعب همج ومتخلف ومابيعرفش يعبر عن غضبه دى ؟أمال أنتوا جايين منين أن شاء الله .
ما كدة نظيف يبقي معذور لما قال عننا غير ناضجين سياسيا و لازمنا ديمقراطية بالقطارة

عقاب الهى

مش عارفة أورى وشي للناس إزاى ..... هو صحيح معظم اللى يعرفونى مش هيخدوا خبر بالعملة اللي عملتها بس بردو حاجة تكسف .إزاى بعد ما تشجع الناس على حاجة وتدعي ليها تكون أول واحد يخلع منها لو جت ف طريق مصلحتك .
الحكاية بدأت إمبارح وماما بتقول للبنت اللى بتساعدنا ف شغل البيت على حاجات تشتريها عشان مانشتريش حاجة النهاردة فقالت لماما يعنى مش حاجى بكرة يا حاجة ؟ ( يوم الحد دة يوم التنضيفة الكبيرة للشقة كل أسبوع )

نطيت أنا من مكاني وقلت لها لأ تيجي طبعا الحكومة مش هتخسر حاجة لما البيت ماينضفش إبقي تعالي بدرى .

قالت طيب بس مش جاية باقية الأسبوع هاسافر بلدنا

ماشي طالما البيت نضيف

وجت فعلا بدرى وطلعت السجاد و الفرش ع السطوح وإبتدت بالشبابيك والأود اللى ع الشارع ..هوبا إييييه الهوا قام .

ربك عزيز منتقم وصدق ربنا لما قال (كبر مقتا عند الله أن تقولوا ما لا تفعلون )

والدنيا اتقلبت تراب وعفرة واللى اتنضف باظ أكتر من الأول
أيوة أنا أستاهل هو عقاب ربنا وأديني ادبست وهشيل الليلة كلها .......

وشي منكي فى الأرض يا امنة .

يا رب .... بس إزاااااااى

يا رب الإضراب يبئى كبير ومؤثر يمكن العالم دى تحس على دمها بئى ( أشك إن عندهم دم )..... ... فى الأول ماكنتش عارفة أشارك إزاى إذا كنت أصلا قاعدة ف البيت ,وإللى زايي لما يشترك ف الإضراب يبووظه . ليييه بئى ؟ لأن الإضراب يعنى تبطل تؤوم بدورك ووظيفتك ف المجتمع إحتجاجا علي أى حاجة لو طالب ماترحش المدرسة أوالكلية, لو بتشتغل ماترحش شغلك سواء حكومى وللا خاص .طيب واللى ما لوهوش ؟ يضرب عن البطالة وينزل يشتغل أى حاجة ؟ حتى ولو يكنس شارعهم ؟ يبئى بووظ الإضراب .... طب إيه ؟ أه مانشتريش حاجة يوميها ؟ لأمش كفاية ماهو ياما أيام ما إشتريناش فيها عادى يعنى .... مافيش غير إنى أؤم بدور تحريضى وأنضم للقلة المارقة مسكت التليفون وكلمت أصحابى اللي بيشتغلو ا (عؤبالي )وأعدنا نتكلم لئيت منهم بيقولوا مالوش لزمة بئى ما الأسعار نزلت أهيه ..إيه اللى رخص يعنى ؟ أالوا الرز والدقيق وأصناف خضار كتير رخصت إمبارح وانهاردة ...... يا جماعة دى إشتغالة من الحكومة عشان تهدى الناس وتفشل الإضراب وهيغلوها تانى . , وبعدين الحكاية مش أسعار بس ده فساد وفوضى وبلا أزرء . .ألولى طيب هنشوف ربنا يسهل . بعدين نزلت أشترى حاجات وأتكلم مع أصحاب المحلات و الزباين كمان لئيت ناس كتير واعية وهتأعد ف البيت (موظفين وطلبة )وناس أكتر مش فاهمين وفاكرين أن بكرة هيكون فيه تكسير وتخريب للمحلات والمواصلات (واحد كبارة أالى حرام إللى بيؤليه ده البلد مش نئصاكو و الناس غلابة )أولت فرصة وماله اما يخاف أهوه هيقفل المحل ويفضل ف البيت هو وعياله .... .......رجعت وأنا مش عارفة ده مؤثر وللا لأ .. زى ما يكون بئى . بس يارب اللى هينزلو مظاهرات يرجعوا أخر النهار بالسلامة وماحدش يتأذى

إللى هيضرب هينضرب

سمعت دلوأت بيان وزارة الداخلية اللى بيهدد الناس ويؤل لهم ما يسماعوش كلام دعاة الفوضى ووالقلة المنحرفة اللى بتدعوا للإضراب (حد يعرفهم ؟ )الوزارة بئى عرفاهم نفر نفر ومرقماهم من واحد ل سبعين مليون ...... أومال إييه ؟ أومال لأه ؟ أومال طبعا ..........