11 أبريل، 2009

الفقد


تمر عليك أوقات تتخيل أنها أصعب أوقات حياتك وأنك لن تعيش اقسى منها
تصبر نفسك بأنها حتما ستنتهى لتعود لأيامك المعتادة مرة أخرى ولن يبقي منها إللا ذكرى بعض المرارة المحتملة .
تسمع عن الفقد وتتعامل مع ألمه من بعيد وإذا اصاب أحد أعزائك تعتقد أن ما تشعر به من ألم هو منتهى الألم وأن الحزن الذى لازمك لعدة أيام لا يساويه حزن بعدها تعود الحياة إلى ما كانت عليه وتعود أنت إلى نفسك معتقدا أن ما شعرت به حينها هو ما سوف يصيبك عند كل محنة فقد جديدة
تسير بك الأيام وأنت تظن انك تعرف وجع الفقد وتألفه لتصحو يوما وتكتشف وكأنك تتعرف عليه لأول مرة وأنك دخلت محنة فقد لا يقدر عقلك على فهمها فهى أقسي مما تحتمل ،تقنع نفسك أنه كابوس وستفيق منه حتما فتمر أيام وأسابيع وشهور ولا ينتهى
تتبدل بعدها تفاصيل الحياة لم تعد أبدا كما كانت حتى ملامح الناس فى عينك لم تعد كما كانت من قبل
تتغير أحلامك رجائاتك وحتى مخاوفك
تجد كل التفاصيل الصغيرة حولك تدعوك للكلام عنه وإذا نبهك أحدهم لضرورة التوقف عن ذلك لتعطى فرصة السلوان لمن حولك تجد نفسك تتكلم كلامه بطريقته تحب ما أحب وتكره ما كره وتتصرف كما كان يتصرف كأنك قررت ان تلغي نفسك لتصل العمر القصير الذى انتهى
يتملكك الرعب كثيرا أن يكون ذلك عدم رضا بقضاء الله فتحاول العودة إلى حياتك مرة أخرى فيأخذك شعور قاسي بالذنب لمجرد التفكير بعودة الحياة كما كانت لتظل ممزقا بين ذنب ما صرت إليه وذنب تركه واستئناف الحياة التى كانت قبل الفقد

27 ديسمبر، 2008

إيه رأيك ؟




إيه رأيك يا حسني أظن ما أنت مبسوط دلوقت ،زمانك متكيف ع الأخر أهو بدل ما تتعب نفسك وتهدد اللي يعدى م الحدود انك تقطع رجله أهو حبايبك عملوا الواجب وقطعوه كله مش رجله بس
ما رضيتش تفتح بوابة السجن من عندك عشان يجيبوا أكل ودوا لولادهم بفلوسهم مش شحاتة بس برضو قلبك الحنين ما طاوعكش تسيبهم جعانين قلت الموت ليهم رحمة صح ؟
قللي صحيح ايه رأيك ف منظر الجثث المرمية ..عجبك ؟ أكيد عجبك
طيب نفسي أعرف كان إيه إحساسك وانت بتتفق مع المجرمة ليفني ع المجزرة دى ....كنت متردد ولا متحمس وفرحان ؟ ........مااتهزيتش ؟
أال كرامتك نقحت عليك أوى لما قامت مظاهرات ف ايران وسوريا تشتم ف سياستك ومشاركتك المخزية ف الحصار اتنحررت أوى واستدعيت السفرا ........طيب ودلوقت كل أللي طلع منك تطلب من شركائك ضبط النفس ورجالتك الاغبيا يقولوا أدى جزاء اللي مايسمعش كلمة ماما تقولها هالبت ما أنت قرحان أوى بقي علي كدة
طيب ايه رأيك وإحنا بنتشتم بسببك من كل واحد عنده ضمير ف الدنيا وللا إيه رأيك واحنا مكسوفين من اننا مصرين بسببك
ماقبلتش تكون جنبك إمارة إسلامية بس طبعا قابل دلوقت تكون جنبك مقبرة جماعية
فتحت المعبر دلوقت ليه ؟؟؟ إيه ؟ماينفعش يعدى منه أكل ودوا بس ينفع يعدى منه نعوش بس ؟
بس ولا يهمك من اللي بيحسبن عليك أنا عارفة انك مش هاتزعل منه ولا هتخاف انت أصلا ماتعرفش ربنا ولا بتعمل ليوم لقاه حساب وأكيد مش هاتتأثر لما أقول لك .....اتفووووووووووووووووووووو

12 ديسمبر، 2008

ورد أتينا

صباح الخير على الورد اللي فتح فى جناين أتينا
وقال كانوا بيقولوا إن المصرين واليونانين فيهم كتير من بعض
لالالالالا خالص دول طلعوا عالم ورق يا راجل
إنما إحنا ؟..........حمول حمول يعني
حتة واحد يادوب الشرطة هناك قتلته قامت الدنيا مظاهرات واشتباكات لسابع يوم لأوالغريب إنهم بيحققوا بتهمة القتل العمد ومش مكفبهم دول بيطالبوا بإستقالة الحكومة والطلبة ف الشوارع بتضرب ف الشرطة لأوعميد الجامعة مانع دخول الشرطة الحرم الجامعي أصله منتخب والعياذ بالله
كل ده عشان واااااااااااااحد عالم هايفة صحيح
إنما إحنا بقي ناس جامدة جامدة ولابيفرق معانا
حد يعد معايا
إشي قتيل المحلة وقتيل المنصورة إشي ف العمرانية وإمبابة والفيوم وأسوان و سينا وسوهاج
وبالعدل الصراحة الشرطة ماعندهاش تفرقة عنصرية
يعني مسلمين ومسيحين تلاقي
رجالة وستات وكمان حوامل
كبار وأطفل وكمان أجنة .......عدل عدل الصراحة
حد نطق ولا نزل الشارع ولا جاب سيرة اسقاط حكومات ولا محاكمات ..مفيييييش
إحنا بتوع الكلام ده بردو ؟

08 ديسمبر، 2008

العيد فرحة ...ماااااااء



كل سنة وكل الناس طيبين وبخير
عيد يعني خروج وزيارات وفسح وقبل دة كله عيد يعني عيدية
مش باحس بالعيد إللا لما أروح الصلاة أناوصحابي والمرة اللي ماأروحش يبقي كأن العيد ماجاش
كل ليلة عيد نتفق بنفس الكلام
-جاية بكرة ؟
-أة طبعا هو مين جاي تاني ؟
- كلهم ..نتقابل فين ؟
-عند الجون ...ماشي ؟
-ماشي .....باي
كل مرة نتقابل بعد الصلاة والخطبة عند الجون اللي علي إيدك الشمال وإنت ف ملعب الستات قصدي مصلي الستات من أيام ثانوى ولحد النهاردة من يجي كدة عشرتاشر سنة وكل اللي زاد علينا إن فيه مننا بقي عنده ولاد
نتقابل بقي وهاتك يا بلالين وصواريخ وغزل البنات لأ ومراجيح
وتتجلي المعيلة في أعبط صورها لما مثلا أميرة (محامية قد الدنيا )تتخانق مع خلود بنت هبة (4 سنين )ع المرجيحة فا هبة (مدرسة محترمة )تقول لهم لا إنتي ولا هى أنا اللي هاركب
ونرجع ع البيت بقي ونقضيها زيارات عائلية لحد ما نتقابل تالت يوم العيد بس شكل النهاردة مافيش خروج تاني بايني هافضل ف البيت علي ذمة الجزار
الجزار قال جاي بعد الضهر
الجزار قال قدامه بيتين قبلنا ويجي
وأخيرا الجزار قافل الموبايل
واضح إن الأستاذ اللي فوق ده لسة له عمر

14 نوفمبر، 2008

اللي مايربيهوش أهله . يربيه الزمن


أنا ف الأصل يعني كائن ليلي نايمة طول النهار وصاحية طول الليل ,والحكاية دى كانت مزعلة أمي وأبويا مني أوى وياما غلبوا معايا بالخناق والتفاهم مافيش فايدة
ماما تقولي طيب عشان صحتك شوفي وشك دبلان ازاى ؟اقول لها لأ ده هو اللي شكله كدة
بابا يقول يا بنتي دا ربنا بيوزع الأرزاق ف البكور . اقول له ماأنا بستني اخد نايبي وبعدين أنام
يووهو مش صاحية بدرى إلا لما اشتغل هه بس
صحيح كانت بتنتابني نوبات فوقان كدة كل كام شهر بس ماكانتش بتطول يعني ادور علي شغل وابتديه وبعدين الحكاية تبوظ لأى سبب وياللعجب كلها كانت بتبقي شغل بعد الضهر وباااااردو ماكنتش باصحي بدرى .
وفى حلقة فوقان جديدة من مسلسل البحث عن شغل رحت مكان وقدمت (المفروض أني أخصائية نفسية )قالو لى كويس أوى بس المطلوب يكون معاكي كورسات كذا وكذا وبعدين تفضلي معانا تحت التدريب والإختبار مدة كدة وبعدين نشوف ......وعنها
ابتديت ف وقت واحد كورسات قياس نفسي وبرمجة و تعديل سلوك وإرشاد نفسي ومنيتسورى للمعاقين وكل واحد منهم ف مكان اللي ف مصر الجديدة واللي ف حلوان واللي ف مدينة نصر واللي ف شبين واللي ف طنطا .
ويشاء العزيز المنتقم إني بعد ماكنت باضرب اتناشر خمساشر ساعة نوم واقوم عاملة دماغ تناحة مش بجمع اربع خمس ساعات دلوقت ,بقيت اصحي خمسة الصبح وستة أكون ف الشارع وبفكر هو النهاردة ايه وهركب ايه عشان اروح فين
ويارب مااخدش بومبة ف الأخر

10 أكتوبر، 2008

أه يا واد يا ويييلعة



حرايق حرايق ....فيه إيه
من أول مجلس الشورى لحد كلية طب بنها وف السكة المسرح القومي على شوية مصانع هنا وهناك وحتي عندنا هنا كنت سامعة من شوية سارينة المطافي بعدها سارينة إسعاف ومش عرفت كان فيه إيه
عدد الحرايق ف الشهرين اللي فاتوا ماحصلش ف سنين
فيه إييييييه
يكونش مصر عليها عفريت ...أه مافيهاش حاجة عادى بتحصل يعني
من يجي عشر سنين وزيادة جرنال الأخبار كان ناشر عن بيت بتولع فيه حرايق وكل ما يطفوها تولع تاني فجابوا واحد يقرا ع البيت لحد ما العفاريت بطلت تولع ف البيت .
يمكن ليه لأ أحنا نشوف حد يقرا على مصر يمكن العفريت اللي عليها ينصرف بقى
واحدة مش فاكرة مين قالت إن الحرايق دى بتدبير الحكومة عشان تلهينا بيها عشان بيدبروا لحاجة عاملينهالنا مفاجعة ده على أساس إننا حايشينهم يعنى
إحتمال برده حتي لو ضعيف بس ياترى بيخططوا لإييييه إييييييه
جماجيمو بيرهبنا بالنار عشان ياخدها خرابة ويشتغل على نضافة ؟عامللي فيها صقر الحلواني إللي حرق الحلوانية عشان اتمردوا عليه
أدى أخرة الفرجة علي روتانا زمان وبانوراما دراما يا اخوانا حد يفصل عنهم وصلة الدش دى قبل ما يجيبوا ضورافها
أما ده لو بجد هاعرف أخيرا مين الي كانوا بيغنوا له ف الأفراح ويقولوا .
أة يا واد يا وييييييلعة
خدها ونزل التيييييرعة

06 أكتوبر، 2008

ستة أكتوبر ألامونيوم

وأنا صغيرة كنت باخاف أوى من يوم ستة أكتوبر عشان بيجيبوا فيلم بتاع ماجدة اللي فيه ضرب مدرسة بحر البقر كنت باخاف من الفيلم ده أوى ووفيلم بدور ماكنتش باحبه عشان مش باحب محمود ياسين وكان فيه إعلان عن أدوات منزلية وحلل ماركة ستة أكتوبر والبت اللي بتقدمه كانت طول الإعلان تقول ستة أكتوبر ألامونيووووم زز وأنا أقول ياربي إيه دخل الحلل ف الأفلام الوحشة دى
ولما كبرت شوية بقيت برده باخاف من يوم ستة أكتوبر بس مش بسبب الأفلام المرة دى لأ كان عندي هاجس إن إسرائيل لو مخططة تهجم على مصر تاني مش هايختاروا غير يوم ستة أكتوبر عشان يموتوا ف الناس فرحتهم الوحيدة
بس لما كبرت أكتر لاقيت إني كنت عبيطة إسرائيل مش محتاجة تهجم تاني علينا ماهو اللي عايزاه بتاخده بالرضا من حكومتنا مش محتاجة لغصبانية
دلوقت بقي مش باقيت أخاف منه ده أنا بقيت باستناه ماهو ده الوقت الوحيد اللي باحس فيه أننا كنا حاجة كبيرة أوى من كلام اللي عاشوه وعملوه
بس اللي شاغل بالي دلوقت حاجة تانية خالص يعني زمان أيام السادات غطي على كل القادة الأبطال اللي عملوا النصر وشوية شوية بقي بطل الحرب والسلام والباقي هوا
جه مبارك وظهرت بقي حكاية الضربة الجوية لما أفتكرنا أنه كان بيحارب لوحده حتي الأغاني والأوبريطات من النسر المصرى شق السما لحد أول طشة تقلية فتحت حلة ملوخية
ماشى كل دة مفهوم بس لما جماجيمو لا قدر الله لاقدر الله بعيد الشر يورث هيقولوا إيه دوره ف الحرب ؟ ولازم يكون دور مؤثر عشان يزيح الكل ويبقي بطل الأوبيرط ولو مالاقولهوش دور مش بعيد يلغوا الإحتفال بستة أكتوبر
عمل إيه؟عمل إيه ؟
يكونش مثلا كان بيقعد مؤدب ومش بيتشاقي وبابا ف البيت عشان بابا يركز ؟
وللا يكونش كان بيروح عند القناة ويطلع لسانه للصهاينة ويغيظهم ودة ساعد ف انخفاض معنوياتهم عشان كدة هزمناهم وبكدة يرجع ليه الفضل الأول ف العبور
أ