10 أكتوبر، 2008

أه يا واد يا ويييلعة



حرايق حرايق ....فيه إيه
من أول مجلس الشورى لحد كلية طب بنها وف السكة المسرح القومي على شوية مصانع هنا وهناك وحتي عندنا هنا كنت سامعة من شوية سارينة المطافي بعدها سارينة إسعاف ومش عرفت كان فيه إيه
عدد الحرايق ف الشهرين اللي فاتوا ماحصلش ف سنين
فيه إييييييه
يكونش مصر عليها عفريت ...أه مافيهاش حاجة عادى بتحصل يعني
من يجي عشر سنين وزيادة جرنال الأخبار كان ناشر عن بيت بتولع فيه حرايق وكل ما يطفوها تولع تاني فجابوا واحد يقرا ع البيت لحد ما العفاريت بطلت تولع ف البيت .
يمكن ليه لأ أحنا نشوف حد يقرا على مصر يمكن العفريت اللي عليها ينصرف بقى
واحدة مش فاكرة مين قالت إن الحرايق دى بتدبير الحكومة عشان تلهينا بيها عشان بيدبروا لحاجة عاملينهالنا مفاجعة ده على أساس إننا حايشينهم يعنى
إحتمال برده حتي لو ضعيف بس ياترى بيخططوا لإييييه إييييييه
جماجيمو بيرهبنا بالنار عشان ياخدها خرابة ويشتغل على نضافة ؟عامللي فيها صقر الحلواني إللي حرق الحلوانية عشان اتمردوا عليه
أدى أخرة الفرجة علي روتانا زمان وبانوراما دراما يا اخوانا حد يفصل عنهم وصلة الدش دى قبل ما يجيبوا ضورافها
أما ده لو بجد هاعرف أخيرا مين الي كانوا بيغنوا له ف الأفراح ويقولوا .
أة يا واد يا وييييييلعة
خدها ونزل التيييييرعة

هناك 7 تعليقات:

Empress appy يقول...

يا حبيبتى احنا فى السنه الماليه والمصايب بتحصل افهميها ضيفى مستشفى المطريه على الموضوع

سنابل يقول...

بس نهاية السنة المالية ف معظم الأماكن بتكون ف شهر يوليو من كل سنة ايشمعنى السنة دى وكمان يوليو فات
لا الموضوع مش عشان يداروا اختلاسات زى ما متعودين شكلها منظم اكتر

عمرو يقول...

مصر يا سنابل مش راكبها عفريت ده راكبها غول .. غول بمعنى كلمة غول
غول عاوز يخربها شكلا و موضوعا علشان لما يسلمها للوريث اللى حايفرض النظام و يوقف الحرايق و يمنع التحرش العلنى الفج بالبنات فى الشوارع ينقال عليه آدى الولد بصحيح اللى الوطن كان محتاجه علشان يرجع النظامو يفرض ميزان العدل المعووج
و كل ده طبعا متخطط له و مرسوم له كويس أوى أوى و بكره الترعه تنشف و يبان اللى فى بطنها

مدونةالغالى يقول...

والنعمه دمك زى العسل
وتعليقك فى مدونتى دمه خفيف
بس مش عايزك تظلمى الحكومه
وتقولى انها بتولع فى البلد
القطر ولعته خالتى ام احمد اللى كانت بتعمل شاى والمسرح ولع بماس كهربا
اما مجلس الشورى ياناس فولع بسبب مشروع قانون ساخن جدآ أدمه عضو معارض واتحط فى وسط الملفات فولع فيها فى عدم وجود الواد الولعه وبعد المجلس عن الترعه فأكلته الحريقه

سنابل يقول...

استاذ عمرو
وبعدين ؟
طب ايه ...يشنقوونا ونسكتولهم؟

سنابل يقول...

الغالي
قولتلي بقي
يعني مشروع القانون الساخن ده مش كان يعمل بأصله ؟
مش كان يصبر شوية لوقت المناقشة ويولع براحته ؟
لالا كان يصبر لجلسة افتتاح الدورة البرلمانية عشان يبقوا متجمعين كلهم وكنا خلصنا

مدونةالغالى يقول...

عندى فرح فى مدونتى وانتى أول المعزومين والدعوه عامه هاتى معاكى أى عدد بس لو حسيتى بأى بنت هتغير من جمال العروسه ماتجيبهاش . منتظركم وعقبال عندكم.