اللي مايربيهوش أهله . يربيه الزمن

أنا ف الأصل يعني كائن ليلي نايمة طول النهار وصاحية طول الليل ,والحكاية دى كانت مزعلة أمي وأبويا مني أوى وياما غلبوا معايا بالخناق والتفاهم مافيش فايدة
ماما تقولي طيب عشان صحتك شوفي وشك دبلان ازاى ؟اقول لها لأ ده هو اللي شكله كدة
بابا يقول يا بنتي دا ربنا بيوزع الأرزاق ف البكور . اقول له ماأنا بستني اخد نايبي وبعدين أنام
يووهو مش صاحية بدرى إلا لما اشتغل هه بس
صحيح كانت بتنتابني نوبات فوقان كدة كل كام شهر بس ماكانتش بتطول يعني ادور علي شغل وابتديه وبعدين الحكاية تبوظ لأى سبب وياللعجب كلها كانت بتبقي شغل بعد الضهر وباااااردو ماكنتش باصحي بدرى .
وفى حلقة فوقان جديدة من مسلسل البحث عن شغل رحت مكان وقدمت (المفروض أني أخصائية نفسية )قالو لى كويس أوى بس المطلوب يكون معاكي كورسات كذا وكذا وبعدين تفضلي معانا تحت التدريب والإختبار مدة كدة وبعدين نشوف ......وعنها
ابتديت ف وقت واحد كورسات قياس نفسي وبرمجة و تعديل سلوك وإرشاد نفسي ومنيتسورى للمعاقين وكل واحد منهم ف مكان اللي ف مصر الجديدة واللي ف حلوان واللي ف مدينة نصر واللي ف شبين واللي ف طنطا .
ويشاء العزيز المنتقم إني بعد ماكنت باضرب اتناشر خمساشر ساعة نوم واقوم عاملة دماغ تناحة مش بجمع اربع خمس ساعات دلوقت ,بقيت اصحي خمسة الصبح وستة أكون ف الشارع وبفكر هو النهاردة ايه وهركب ايه عشان اروح فين
ويارب مااخدش بومبة ف الأخر

أه يا واد يا ويييلعة

حرايق حرايق ....فيه إيه
من أول مجلس الشورى لحد كلية طب بنها وف السكة المسرح القومي على شوية مصانع هنا وهناك وحتي عندنا هنا كنت سامعة من شوية سارينة المطافي بعدها سارينة إسعاف ومش عرفت كان فيه إيه
عدد الحرايق ف الشهرين اللي فاتوا ماحصلش ف سنين
فيه إييييييه
يكونش مصر عليها عفريت ...أه مافيهاش حاجة عادى بتحصل يعني
من يجي عشر سنين وزيادة جرنال الأخبار كان ناشر عن بيت بتولع فيه حرايق وكل ما يطفوها تولع تاني فجابوا واحد يقرا ع البيت لحد ما العفاريت بطلت تولع ف البيت .
يمكن ليه لأ أحنا نشوف حد يقرا على مصر يمكن العفريت اللي عليها ينصرف بقى
واحدة مش فاكرة مين قالت إن الحرايق دى بتدبير الحكومة عشان تلهينا بيها عشان بيدبروا لحاجة عاملينهالنا مفاجعة ده على أساس إننا حايشينهم يعنى
إحتمال برده حتي لو ضعيف بس ياترى بيخططوا لإييييه إييييييه
جماجيمو بيرهبنا بالنار عشان ياخدها خرابة ويشتغل على نضافة ؟عامللي فيها صقر الحلواني إللي حرق الحلوانية عشان اتمردوا عليه
أدى أخرة الفرجة علي روتانا زمان وبانوراما دراما يا اخوانا حد يفصل عنهم وصلة الدش دى قبل ما يجيبوا ضورافها
أما ده لو بجد هاعرف أخيرا مين الي كانوا بيغنوا له ف الأفراح ويقولوا .
أة يا واد يا وييييييلعة
خدها ونزل التيييييرعة

ستة أكتوبر ألامونيوم

وأنا صغيرة كنت باخاف أوى من يوم ستة أكتوبر عشان بيجيبوا فيلم بتاع ماجدة اللي فيه ضرب مدرسة بحر البقر كنت باخاف من الفيلم ده أوى ووفيلم بدور ماكنتش باحبه عشان مش باحب محمود ياسين وكان فيه إعلان عن أدوات منزلية وحلل ماركة ستة أكتوبر والبت اللي بتقدمه كانت طول الإعلان تقول ستة أكتوبر ألامونيووووم زز وأنا أقول ياربي إيه دخل الحلل ف الأفلام الوحشة دى
ولما كبرت شوية بقيت برده باخاف من يوم ستة أكتوبر بس مش بسبب الأفلام المرة دى لأ كان عندي هاجس إن إسرائيل لو مخططة تهجم على مصر تاني مش هايختاروا غير يوم ستة أكتوبر عشان يموتوا ف الناس فرحتهم الوحيدة
بس لما كبرت أكتر لاقيت إني كنت عبيطة إسرائيل مش محتاجة تهجم تاني علينا ماهو اللي عايزاه بتاخده بالرضا من حكومتنا مش محتاجة لغصبانية
دلوقت بقي مش باقيت أخاف منه ده أنا بقيت باستناه ماهو ده الوقت الوحيد اللي باحس فيه أننا كنا حاجة كبيرة أوى من كلام اللي عاشوه وعملوه
بس اللي شاغل بالي دلوقت حاجة تانية خالص يعني زمان أيام السادات غطي على كل القادة الأبطال اللي عملوا النصر وشوية شوية بقي بطل الحرب والسلام والباقي هوا
جه مبارك وظهرت بقي حكاية الضربة الجوية لما أفتكرنا أنه كان بيحارب لوحده حتي الأغاني والأوبريطات من النسر المصرى شق السما لحد أول طشة تقلية فتحت حلة ملوخية
ماشى كل دة مفهوم بس لما جماجيمو لا قدر الله لاقدر الله بعيد الشر يورث هيقولوا إيه دوره ف الحرب ؟ ولازم يكون دور مؤثر عشان يزيح الكل ويبقي بطل الأوبيرط ولو مالاقولهوش دور مش بعيد يلغوا الإحتفال بستة أكتوبر
عمل إيه؟عمل إيه ؟
يكونش مثلا كان بيقعد مؤدب ومش بيتشاقي وبابا ف البيت عشان بابا يركز ؟
وللا يكونش كان بيروح عند القناة ويطلع لسانه للصهاينة ويغيظهم ودة ساعد ف انخفاض معنوياتهم عشان كدة هزمناهم وبكدة يرجع ليه الفضل الأول ف العبور
أ

وأخيرا .....نت

النت جه النت جه النت جه
شهر ونص من غير تليفزيون ولا تليفون وطبعا من غير نت
التليفزيون كان شغال بس ع الأولى والتانية بس يعني كنت أنا والزمن وتامر أمين ولما ربنا يرحمنا شوية بمحمود سعد يجيلنا ضيوف أما أيام تشامر ماحدش يعبرنا ويبقي مافيش غيره قدامي
لسة مستغربة المكان معادش زى ماسبناه من تمن سنين
بيوت كتيرة اتهدت واتبنت من جديد زى بيتنا غيرت شكل الشارع والمحلات والتكاتك خلوه زحمة ودوشة بس أحلي حاجة صوت عم سعد ف الأذان .كان واحشني أوى ورحمني من الأصوات اللي كانت هناك واللي كانوا بيزعقوا ف الأدان وكأنهم بيقولوا قوموا صلوا ياجزم
برده لسة مستغربة أوضتي الجديدة أوى وكل مااجي أنام اقعد أقنع نفسي .....دى أوضتي دى أوضتي دى أوضتي .لحد ما النوم ياخدني
ياله كلها كام شهر وأتعود
بس اللي هايجيب لي سيرة نقل وعزال تاني هتبريى منه وأحرمه من الميراث

أخر ليلة

تمن سنين ويومين إتنين ... ونص ساعة ودقيتين
عمر برده أول ماجينا هنا ماكنتش طايقاه ومش عرفت أنام مدة طويلة بس خدت عليه وحبيته واتصاحبت مع عزة اللي قدامنا ومنى اللي جنبنا واخدت علي مقابلاتنا كل يوم إن ماكانش ف بيت حد فينا يبقي نرمي لبعض مشابك ونتقابل ف البلكونات
دى أخر ليلة هنام ف الأوضة دى شافت معايا أيام .يااااااه
هى صحيح كانت حر قوى ف الصيف بس كانت دفا ف الشتا وكمان كنت باشوف من بلكونتها القمر لما بيطع فوق بيت عزة
مش عارفة هانقل شاليات الزرع إزاى بيقولوا لما الزرع بيغير مكانه بيزعل ويدبل
بس الأوضة حلوة وهي فاضية واسعة كدة وبرحة بس فيها المرتبة ع الأرض والراديو جنبها والكمبيوتر وشنطة فيها الهدوم اللي هانمشي بيها بكرة .وباقي العفش كله اتنقل
الجيران بيقولوا هايزورونا هناك بس أنا عارفة أنهم هايتشغلوا ومش هانشوف بعض كل يوم زى الأول .....هايوحشونى أوى

بنعزل

لتاني مرة بإرهاق ساحق بنعزل
أول مرة كانت من تمن سنين بالظبط ..لما سبنا البيت القديم وجينا هنا
لتاني مرة بنلم الحاجات ونشوف ايه يتنقل قبل ايه بس المرة دى أصعب . زمان عزلنا احنا بس لكن المرة دى بننقل عفش أربع شقق أحنا واخواتي
من كتر مابينادوا عليا عشرة ف وقت واحد كرهت اسمي وقررت أغيره
يعني امبارح ابويا بينادي من فوق السطح عشان اطلع افك معاه الدش ومرات أخويا بتنادي عشان الم معاها الصيني والتانية بتنادي عشان أنزل أقف مع النجار وهو بيفك الدولاب وأمي بتناديلي أرد ع التليفون وأخويا بيناديلي أعمله قهوة كل ده ف وقت واحد وكله بيزعق إني مقصرة ومافيش حد صابر
فما كان مني إلا إني قعدت ع السلم ورقعت بالصوت
مش عارفة علي ماالحكاية دى تخلص هيحصلي إيه بالظبط
يا ترى هروح معاهم البيت الجديد وللا هتجنن وللا هاخد لقب مرحومة ..........الله أعلم

اللهم قوى إيمانهم

ف شارعنا القديم واللي هانرجعله قريب إن شاء الله مسجد بيمثل قيمة كبيرة عند سكان الشارع خصوصا القدام منهم وكمان له دراويشه وخدامه
المسجد دة اتهد ف نفس الوقت اللي هدينا فيه بيتنا القديم ، والإتنين بيتبنوا دلوقت وقربوا يخلصوا
المبني القديم المسجد كان فيه ضريح ، دراويش المسجد اللي كانوا بيتابعوا تفاصيل بناه خطوة خطوة طلبوا من المقاول إنه يعلي مكان الضريح الجديد ويزخرفه
المقاول طلع سلفي بيحرم وجود الأضرحة أصلا وبيعتبر المروجين لها من الفئات الضالة ورفض يعمل لهم اللي طلبوه ، فراحوا جايبين عمال تانين عملولهم التعلية وركبوا الخشب المزخرف وظبطوا اللي عايزينه
جه المقاول لقي الضريح اتجنن وراح جاب عماله وراسه وألف جزمة يهد الضريح
اللي بنوه هيسكتوا ؟.....طبعا لأ.منعوهم يدخلوا
دول ناس كلهم إيمان وتقوى ، وكمان فريق المقاول كلهم إيمان وتقوى
وقامت خناقة بين الفريقين بالمطاوى والسنج
أة والنعمة مطاوى وسنج