مالهاش دعوة بالعالم السفلي وللا بشمهورش والسكة دى خالص
أنا قصدى النجاتيف ايوة النجاتيف بتاع صورة صلاح جاهين واللي بروزها بصوت عبد الحليم وصورلنا فيها بلد بجد
على قد أحلامه ما كانت عظيمة الصورة كمان طلعت حلوة اوى
وده طبعا بمناسبة ان مصر اليوم فى عيد هييه واللي اكيد اهم حاجة فيه انه اجازة
نيجى بقي لحكاية العفريتة بقي احنا لو اتخيلنا عم صلاح جاهين موجود ف الزمن المهبب ده اذا افترضنا اصلا انه كان يقدر يتحمل حال الدنيا المايل ده كان زمانه اعاد صياغة أحلامه ف صورة وخلاها كوابس واقعية ف عفريتة
رجاء مراجعة الاغنية وقلب كل كلامها عشان تبقي واقعية اصلي دورت عليها مش لقيتها كاملة فا حسب ما افتكر بقي
فى صورة صورلنا الشعب فرحان تحت الراية المنصورة اما بقي ف العفريتة الشعب قرفان والراية مقهورة بعد ما بقت على وش تورتة يقطعوها الصهاينة ويطفحوها
اما الزمان فوقعنا من حساباته وبعدنا عن بعض كمان وسواء كنت ف الميدان او براه فشكلك هايطلع بهتان ف العفريتة
خضرة مسرطنة وماية ملوثة وشمس لسة زى ماهى عفية عشان مش طايلينها بس وقبة سما بالسحابة السودا مستخبية ومعالم ذل وعبودية ونسايم خيبة قوية ومداين صاحية الفجرية بجراكن تدور على بق ماية دى بلدنا مصر المنوفية فى عفريتة اخر بتنجااااااان
نلاقي كمان انه بقي على مدد الشوف بدلة وبدلة كبروا بفلوسنا وقروضنا
المدخنة بقت قايدة بنار عمال المعاش المبكر تحتها زى ما يكون كدة حديد عز واسمنت راتب
وقدامه من أغلى ولادنا عامل ومهندس طهقان شبان والشبان فى بلدنا م البحر بيطلع غرقان
كلنا هنا ف العفريتة زمايل من اصغر طفلة بجدايل على نانسى وهيفا بتتمايل
للفلاح ابو ديون تقايل للواعظ حافظ مش فاهم القرآن
للجندى الأسد اللي شايل على كتفه مسؤلية نفسه عشان لو اتنش ع الحدود مالوش دية بعد مااتعذروا ف قرشين وباعوا درع الاوطان وعملوا بتمنه منتجع شارم
وبعيد عن العين لاكين ف العفريتة اوضح ناس ناس تحت حر الجبال والقلب تعب خلاص يخرجو الغاز من هنا يروح اسرائيل من هنا
بلاش بقي موضوع الدكاترة راجع اعتصامات واضرابات الدكاترة والعلما راجع مشاكل بتوع الطاقة الذرية
والمعامل ما اعرفشي عنها حاجة والاساتذة راجع امتحانات الكادر
بقي كله بقي من الشعب العاطل حتى اللي بيشتغلوا
نيجى بقي للشباب السكر اللي على مكاتبهم ايوة بتوع العقود المؤقتة يبقي وضع طبيعي جدا انهم يطلعوا روح اللي يعامل
كفاية كدة انا مش فاكرة ليها باقي وللا خلصت
المهم دلوقتى ان صلاح جاهين مات بدرى ربنا بيحبه ما شافشي اللي احنا فيه ولا شاف اللي عملته ف كلامه
اجى بقي لأحلى حاجة قريتها بمناسبة عيد الثورة ف الدستور الأسبوعى
س .....قبل 53 سنة وفى عيد الثورة قال عبد الناصر بتحدى (هنبنى السد ولو بالمقاطف .)..ترى ماذا تبقي من هذه العبارة ؟؟
ج ..... المقاطف
هناك 8 تعليقات:
غيبه طويله وعوده جميله
نقد ظريف وعندك حق بجد ...... الحلم ضاع الصوره اتشوهت
ربنا يصلح حال البلد
يعنى معقول مافيش فى الصوره و لا فى العفريته بصيص أمل كده و لو صغنون يبل الريق ؟؟!!
مش معقول يا جماعه أكيد فيه حاجه برضو كويسه و بتدى أمل ..
بس حلوه حكاية المقاطف دى :))
حلم ايه ياستنا؟ انتم صدقتم ناصر والحماسه اللي كانت منتشره
شعبنا معروف انه يسخن في اول الموج وبعد كده ترجع ريمنا لعادتها القديمه
علشان كده صلاح مات بحسرته
فتاة من الصعيد
تسلمي يا جميلة
هى الصورة اتشوهت طبعا اوى خالص
بس الحلم هايفضل جوانا عشان فعلا محتاجينه اوى
ومن غير الحلم ف بكرة احسن ازاى نتحمل الواقع الصعب ده
++++++++++++++++
عمرو
ازيك واخبار السفارى ايه ؟يا رب تكون مبسوط
يعنى لو انا شايفة حاجة عدلة كنت اعزها عنك بردو ؟
بس عندك حق اكيد فيه حاجات كويسة بس محتاجة مجهود عشان تتشاف فما بالك بقي عشان تكبر محتاجة ايه
وكما قال الزعيم مصطفى كامل
عم قول يا رب
+++++++++++++
dr>lecter
ازيك عامل ايه
ايوة حلم بس كان قابل للتحقيق وفعلا كتير منه اتحقق
وناصر ما كانش بيكدب وزى ما قال عمنا احمد فؤاد نجم
عمل حاجات معجزة وحاجات كتير خابت
وان كان جرح قلبنا كل الجروح طابت
فعلا على قد الحلم الصورة بتترسم
شكلك مدونة قديمة ولسه راجعة طااازة
عودة موفقة
وعلى فكرة اسم المدونة جميل اوى
يا سنابل القمح
السلام عليكم ورحمة الله وبركاته
كل عام وانت بخير ورمضان كريم ان شاء الله ويعيده الله عليكى بالخير واليمن والبركات
زمان كان عبد الحليم حافظ وصلاح جاهين بيغنوا وكانوا مقتنعين من قلوبهم واحنا معاهم ان الحال احلى حال ... لكن للاسف كانوا بيضحكوا علينا وكنا بنضحك على نفسنا وكان الحال لا احلى ولا حاجه.. واللى احنا فيه النهارده امتداد للحال وامتداد للاستبداد والدكتاتوريه ... مش حاطول عشان انا بخبط فى الحلل
كل سنه وانت بخير
سنابل
السلام عليكم ورحمة الله وبركاته
عيد سعيد عليكم وعلى عائلتكم
كل عام وانتم بخير
يعيده الله عليكم بالخير واليمن والبركات
إرسال تعليق