اللهم قوى إيمانهم

ف شارعنا القديم واللي هانرجعله قريب إن شاء الله مسجد بيمثل قيمة كبيرة عند سكان الشارع خصوصا القدام منهم وكمان له دراويشه وخدامه
المسجد دة اتهد ف نفس الوقت اللي هدينا فيه بيتنا القديم ، والإتنين بيتبنوا دلوقت وقربوا يخلصوا
المبني القديم المسجد كان فيه ضريح ، دراويش المسجد اللي كانوا بيتابعوا تفاصيل بناه خطوة خطوة طلبوا من المقاول إنه يعلي مكان الضريح الجديد ويزخرفه
المقاول طلع سلفي بيحرم وجود الأضرحة أصلا وبيعتبر المروجين لها من الفئات الضالة ورفض يعمل لهم اللي طلبوه ، فراحوا جايبين عمال تانين عملولهم التعلية وركبوا الخشب المزخرف وظبطوا اللي عايزينه
جه المقاول لقي الضريح اتجنن وراح جاب عماله وراسه وألف جزمة يهد الضريح
اللي بنوه هيسكتوا ؟.....طبعا لأ.منعوهم يدخلوا
دول ناس كلهم إيمان وتقوى ، وكمان فريق المقاول كلهم إيمان وتقوى
وقامت خناقة بين الفريقين بالمطاوى والسنج
أة والنعمة مطاوى وسنج

د. المسيرى .....وداعا

لسة عارفة دلوقت
لقيت بابا بيقولي المسيري مات أمبارح
مصدومة ومش قادرة ابطل عياط
يعني البلد دى هاتفضل مسكينة كدة ؟ الشرفا فيها يمشوا ويسيبونا ومايفضلش علي رقبتها غير الأندال
فاكرة كويس المرة الوحيدة اللي شفته فيها
ندوة ف كلية الأداب جامعة طنطا وقت إنتفاضة الأقصي
وأنا وسط عشرات الطلبة باسمعه
صحيح كانت مرة واحدةومن بعيد بس خلتني كل ما أقراله أستحضر نبرة صوته وتعبيرات وشه كأنه بيقرا لي اللي كاتبه

الفووووووول يا ولاد المفترية

صحيت النهاردة مفزوعة على صوت أمي وهى بتكلم حد ف التليفون بطريقة ان فيه مصيبة حصلت .
(إزاى لا مش معقول .حرام ............وهو ف الغيط ؟ .....لالالالالا .وهو ف الغيط ؟.)
أنا قلت استر يا رب ياترى مين اللي مات ومات وهو ف الغيط كمان مين ؟ مين ؟
أنا - (وأنا بارتعش وهعيط ) فيه ايه يا ماما .....مين .مين
ماما -( وهى وشها أصفر ) الفول
أنا - مااااااااااااااااات ؟
ماما -بقي بخمسة جنيه ونص وهو لسه ف الغيط
أنا -ايه ده يعني ماحدش مات ؟
ماما -لأ لسه
ده الحوار اللي دار بيني وبين ماما بعدين قعد ت كدة علي ما هديت أصلي كنت باتنفض من الخضة .وعلى ما استوعبت اللي امي قالته صرخت
أنا -بتقولي كام ؟أمال هيتباع قطاعي بكام ؟ ده احنا مخزنين خزين البيت السنة اللي فاتت على اتنين جنيه وربع
ماما -ماهو جوز خالتك بيقول انه هيتخزن السنةدى من ستة ل ستة ونص
أنا - يالهوى والناس تاكل ايه ؟ طب وعلى اخر السنة يوصل لكام ؟...... اتناشر وللا خمستاشر جنيه ؟ يا دى النيلة حتي الفول ؟
طب دلوقت بنحسب مرتب الموظف يعادل كام كيلو لحمة وفيه ناس بتقول مرتبها يساوى أربعة كيلو لحمة .طب ايه هيقول مرتبي يساوي تلتاشر كيلو فول ؟ايه ده
طب الطعمياية هتبقي بكام وهتبقي قد إيه
طب الجماعة بتوع المظاهرت اللي كانوا بيقولوا .......هما بياكلوا حمام وفراخ واحنا الفول دوخنا وداخ .هيقولوا ايه بعد كدة ده حتي الفول هيبقي حلم وترف
من يومين كان فيه واحد مش فاكرة هو مين بيتكلم ف برنامج مش فاكرة هو إيه كان بيقول إنه مستغرب الناس اللي بتشتكي من الغلا الحاجة اللي تغلي يقاطعوها .الحديد غلي قاطعوه هيرخص ..اللحمة غليت قاطعوها فالجزارين غصب عنهم هيرخصوها ، نفسي دلوقت أفتكر هو مين وأعرف رأيه برده نقاطع الفول سيادتك؟ناكل بعض بقي .............آطيعة

ايه اللى حصل

باظت ليه ................................. يمكن صحيح إللى دعوا للإضراب اختاروا يوم غلط بس أنا كنت مستبعدة السبب ده و فاكرة إن الناس مش هيفرق معاها اليوم لأن الموجوع مش يفرق معاه إحنا كام ف الشهر بس طلعت غلطانة . مكانش ينفع يوم الإضراب اللي بيعبر عن أوجاع الناس و اللى له مطالب جادة يتحط ف يوم مسخرة .نوارة عندها حق ف اللى قالته
بس كمان فيه حاجة مهمة متغيرة عن ستة إبريل . مشاركة الإخوان المرة دى ماشاء الله نورت الليلة وبركاتهم حلت..... أصلها إرف وأقدام ....................
طبعا العلاوة لها تأثير ......ضربة استباقية للإضراب بس مين الأهبل اللي يفرح بيها والناس عارفة إن قبل ما يمسكوها ف إديهم الأسعار هتكون غليت أكتر منها و بعدين دى لسه هايدوروا لها على موارد ................ للدرجة دى أحنا سهل ينضحك علينا ؟
طب إيه خلاص على كدة ؟وللا الناس لسة ماجابتش أخرها ...........................كله هايبان

خليك ف البيت

البتتر ده من عند نوارة
مطالب مشروعة يعني مش كفر
..أهو اليوم بدأ وربنا يستر

أطشييعة

.ياللا حالا بالا بالا حييوا أبو علاء .. .. ... ..
... .. .هيتم التمانين الليلة ولإحنا فى بلاء ... ...................
....متحيوا أبو علاء ....... .....................
هييييييييييييييييييي ...... ....................
هو انا صراحة كنت متضايقة من ربط معاد الأضراب باليوم ده بس بعد وصلات النفاق المركز ف جرايد الحكومة اللي زاادت جرعته أوى السنه دى قلت ليه لأ ماهو لولا اللي حصل من تمانيييييييين سنه ماكانش ده بقى حالنا دلوقت وعموما تحيا مصر وإحنا مش مهم وطبعا كلنا عارفين إن مصر مبارك يبقى بطريقة المنطق بتاع ثانوى تحيا مبارك وإحنا مش مهم

صلوا من أجل مصر

الصورة دى من عند مراقب مصرى ..
يوم الخميس ف برنامج الطبعة الأولى الأديب يوسف القعيد قال كلمة بترن ف ودانى لحد دلوقت قال (أنا خايف أصحى من النوم مرة ملاقيش مصر )كلمة مرعبة .......................بس لأ مش هنسيبها تضيع . إضراب النهاردة بيقول كدة .....كلنا هنصلي عشانها بجد محتاجين رحمة ربنا