العيد فرخة

كل سنة والكل طيب وبخير ربنا يعيده علينا واحنا احسن من كدة شوية .لأ نبقي احسن كتير

رغم إن كل اللي رتبت ليه ف العيد واللي واخدة عليه وبيحسسني بان العيد جه باظ تقريبا الا اني لسة متفائلة ما هو لسه ف اوله بردو نديله فرصة
يعنى مثلا كان المفروض اصحي بدرى صحيت متأخر
كان المفروض الحق صلاة العيد عشان هى اللي بتحسسني انه جه ومالحقتهاش وبردو متفائلة
دخلت من ناحية واصحابى خرجوا من ناحية تانية وماتقابلناش وبردو لسه متفائلة
سمعت صباح الخير وكل سنة وانتي طيبة من ناس كتير اوى إلا صباح الخير واحدة اتوقعتها تكون الأولى ما سمعتهاش لدلوقت وبردو لسه متفائلة
الدبح هيتأخرلأخر النهار ويمكن بالليل او بكره يعنى مافيش لحمة للغدا ونمشيها فراخ النهاردة ودى ف حد ذاتها حاجة رخمة بس بردو متفائلة
ناديت على بتاع غزل البنات كتير اوى وماسمعنيش من زحمة الشارع وبردو متفائلة
فورت اللبن وانا باغليه وبردو لسه متفائلة

ولاد اخويا راحوا يعيدوا على جدتهم لمامتهم ومش لاقية حد العب معاه خلاويص ع السلم وماينفعش اجيب عيال الجران لا تبقي فضيحة ومع ذلك متفائلة

طلبت مع ابويا انه يدهن المرجيحة اللي ع السطوح امبارح ال ايه المطر هيخليها تصدى وبردو متفائلة

بأمارة ايه كل الابتهاج اللي انا فيه ده !!
حد عنده تفسير للحالة الغريبة دى ؟

يالا ما علينا

كل سنة وانتو طيبين