العيش .. والعيشة ..واللى عايشينها

طول المدة اللى فاتت واحنا (إحنا دى مش بيتنا بس لآ ده شارعنا والشوارع المجاورة بلدنا يعنى )بنتابع أزمة العيش و طوابيره وضحاياه ف الجرايدوالتلفيزيون زى ما بنتابع حصار غزة وللا أحداث العراق .... إيه ده معقول ده بيحصل ف مصر ؟ ده إحنا ف نعمة . واسمع أبويا وهو بيتفرج ويقول الحمد لله الذى عافانا مما ابتلاكم به وفضلنا عن كثير من ما خلق تفضيلا ليه بقي ؟ أصل أحنا نسينا حكاية مشوار شرا العيش ده من سنين وأصبح من ذكريات الماضي الأليم ..وبقى الواحد يصحى من النوم ويتمطع كده ويمد إيده يجيب كيس العيش من ع البوابة . والحكاية كلها أربعة جنيه ف الشهر زيادة من تمن العيش ياخدهم الشبان اللى بيوصلوه للبيوت بإشراف الحزن الوطنى (ودى الحسنة الوحيدة له ) الناس مرتاحة وشبان غلابة كتير يسترزقوا بغض النظر عن جودة العيش غمض عنيك وكل واحمد ربنا إنه بيجيلك لحد عندك ... إيه هاتنهب ؟ أوم إيه .. دوام الحال من المحال ,ماتعرفش مين ابن الحرام إللي فتح عين الحكومة علينا ودلها إن فيه ناس نفدوا من تحت إديهم نهاركم أسود ومش معدى, بتستغفلونا يا مواطن منك ليه ؟ ومنظمين ومرتاحين وكمان فرص عمل ؟ خلاص انتهى . كان حلم وراح . المساواة فى الظلم ذل وانتو تستاهلوا الذل . طيب يا بيه ماتمشوا الفكرة دى ف البلد كلها قالك لأ أنا ماحدش يلوى دراعي (جاك قطعه ). وهات يا ملى استمارات أشى عدد افراد الأسرة وأشى عدد الأرغفة والعنوان بالتفصيل لحد رقم الشقة . ابويا إكمنه راجل طيب قال هاينظموها ويعمموها ده حتى كاتبين عايزين العيش الصبح وللا بالليل قلتله ناقص يخيرونا عايزينه مفقش وللا ملدن اتارى احنا اللى لبسنا العمة . راحوا واخدين قوايم أسامى المشتركين ومبعترينها على بقالين البلد وعملوهم منافز بيع . يعنى تبقى ساكن ف أول البلد وجنبك ع الناصية منفز بيع بس اسمك ف أخر البلد, طيب يا جماعة ماانا جنبي واحد يقولك لو مش عاجبك ان شا الله ما عنك خدت لو عايز تفطر العيال تطخ مشوار وتقف طابور ومعاك بطاقة باسمك عشان البقال يمضي لك بإنك خدت العيش بتاعك .. وبدل ما اسم المشروع كان توصيل الخبز للمنازل بقى توصيل المنازل للخبز يعنى تعزل جنب عيشكو يا حلو وبعد ما كانت كل المشكلة مين ينزل السلم يجيب العيش من ع البوابة (كانت أيام )بقى بهدلة العيش حديث المديشنة وأنا ماشية بادور علي منفز البيع اللى فيه عيشنا سمعت اللي بيحسبن واللى بيقول ان شاالله يدوخوا دوختنا وأنا اقول الهى يجعل دعاهم من حدك ومن نصيبك يا اللي ف بالى

سمي 00وخش برجلك اليمين

بعد ما رشيت مايه وبخرت المطرح ابتدي اول كلام ليا فى العالم الإفتراضى اللى اسمه النت بالرغم من انى باتفرج واتابع من اكتر من سنة ومن اول يوم تابعت فيه مدونات وأنا عايزة أقول أنا كمان 0بس التدوين زيه زى غيره من الحاجات اللى عايزة اعملها وما بتتعملش 000000 00 عايزة ارجع ادور على شغل 00 عايزة اسجل الماجستير 00 عايزة ازور اصحابي 00 عايزة ازرع شجرة ليمون 00عايزة اغير لمبة السلم والبلكونة 00عايزة اصلح الكاسيت 00عايزة اتعلم أطبخ الخبيزة 0000عايزة اعمل مدونة طبعا مش كل الحاجات دى على درجه واحدة من الاهمية بس كلهم بيخضعوا لقانون واحد قانون التسويف والتأجيل من غير سبب 00 طيب ايه اللى خلانى ابتدى 00أبدا كل ما حد يسألني عملتي كذا ؟ اقول لسه بس هاعمله ان شاء الله 00 إمته ؟ ربنا يسهل 0 لحد ما البت بنت اختي انفجرت فيا وقالتلي اعملي حاجة ف حياتك بقى ياشيخة 0 بصراحة اتكسفت من نفسي شكلي بقي وحش قدام العيال قمت عملت ايييه ؟ هما حاجتين أولا زرعت شجرة الليمون ثانيا عملت المدونة 0 طيب هاكتب ايه بقى ؟0000 الصراحة وأنا باتابع المدونات كان عندى افكار كتير بس دلوقت ولا الهوا مخي مغسول ب تايد بس أكيد ربنا هايبعت وياترى المدونة دى بعد سنة مثلا هاتبقي موجودة وللا هاألغيها ولو فضلت موجوده هاتكون عاملة إزاى هافضل اكلم نفسى وللا حد هاياخد بحسى ف الخلا ده 0هاترجعلي افكار موضوعات للكتابة وللا الهوا هايفضل يصفر ف دماغي عموما الأيام مافيش اسرع منها بكرة تعدى سنة ونشوف وبعدين أنا شايلة هم الكلام اللي هايتكتب هنا ليه ؟ ما طوب الأرض بيدون يعني جت عندى و عطلت