الله يرحم ابويا كان عنده يقين ان ده هيحصل ف يوم وان اليوم ده قريب
وكان نفسه اوى يشوف اللي بيحصلك دلوقت
مش كنا نفوق بدري سنة ؟
يالا كله بمعاد
بس المهم ان ابويا طول عمره بيقول عنك ان جلدك تخين ومش بتحس
اه والله مسيطر اوى علي تفكيري الوصف ده
انت ليه مش قادر تقبل انك ماباقيتش رئيس شرعي لمصر
ماعندكش تمييز خالص كدة ؟
ده لو فرضنا انك كنت مهنينا ومعيشنا احسن عيشة طول 30 سنة اللي فاتوا دول يكفي اوى اللي حصل ف الحداشر يوم عشان يلغوا شرعيتك
ايه ؟ لسه مذهول من كراهية الناس ليك ؟
لا انت عارف من زمان انهم بيكرهوك بس ماكنتش متخيل ابدا انهم يقدروا يقولوها عالية ومدوية كدة
بعد سنين حاولت مع نظامك تربط الناس ف ساقية لقمة العيش وفكرت انهم اعتبروك قدرمحتوم مامنوش مهرب وان وجودك من طبائع الأشياء وان مصر مبارك
لما تمانية مليون مش ممثلين للشعب طيب ننطق لك حجارة الشوارع يعني ؟
فيه رأى حلو اوى
وانا باقلب ف القنوات امبارح بالليل مش عارفة ايه اللي جاب المحور كانت واحدة بتقول انها بتحب مبارك وعايزاه يستني قلبت بسرعة لاقيت لولو بنت اخويا (4 سنين ) بتقول لي استني يا عمتو فيه واحدة اهه بتحبه وعاوزاه حد يقول له عليها خليه يروح عندها بئا وخلاص
