فى انتظار الكسر

كتير لما باروح عند فاتيما بارجع بمواجهة جديدة مع حاجة جوايا كنت خايفة اشوفها أو احساس ماكنتش لاقية كلام يترجمه
و كتير تعدى عليا حالة افتكر كلام قريته ليها من وقت طويل ارجع ادور عليه وأقراه تاني وأحسه أكتر
لحد ما لقيتها انهاردة بتحكي عن القلوب الازاز
بتحكي عن الخوف اللي جوايا وبشوفه نايمة صاحية
بتحكي عن سكينة الفراق اللي شايفاها بتقرب مني كل يوم ومش قادرة احوشها
بتحكي عن قلوب تشبه قلوب اعرفها وكنت بتدارى و أهرب منها عشان ما أفكرش ف اللي مستنيني معاك
بتحكي عن نزف الروح نقطة نقطة و قسوة الموت المتجدد مع كل نبضة

اه صحيح زى ما انت  قلت الناس مش بتموت لما بيسيبوا بعض
بس مين قال ان الموت اوحش حاجة ممكن تحصللي

أصل انت متعرفش ان القلب القطيفة اللي بيخلي كل ملامحي تقولك انتي بحبك زى ما أنت وصفته أصلا ازاز
وأن العيون اللي انت بتحبها تحاوطك بحضن نظرتها مش شايفة دلوقت غير الحجر اللي على طرف لسانك وانى متكتفة مش قادرة  أمنعه انه  ينطلق و يفتفت القلب الازاز

ياااااااااااااااه

وحشتني المدونة

بعد عشر شهور تقريبا
مش عارفة مين فينا كان ضايع من التاني
اخدت بالي من الكلمة اللي كتباها من اول يوم للمدونة دى
جوايا كلام كتير جايز يطلع وجايز لا
كنت داخلة رهان مع نفسي ف حق البوح وان كل حد فينا لازم يترجم الكلام اللي جواه للغة منطوقة تخرج معاها كل تبعات الكتمان
على اساس ان (اللي مايتكلم يا كتر همه )
وانا مش شاطرة ف الكلام فاخسرت الرهان ..
ولما رجعت هنا تاني فكرت تاني ف حلم البوح ...يمكن

شعب من الضحايا

منهم من فقد حياته
منهم من فقد عينيه
منهم من فقد فلذة كبده
ومنهم من فقد حرمة جسده

من أجل نوع اخر من الضحايا

منهم من فقد عقله
منهم من فقد نخوته
منهم من فقد ضميره
ومنهم من فقد إنسانيته

ما يلزمناش انصاص

أيها الشعب
احنا انضحك علينا
نص حق ..نص عدل ..نص محاكمات ...نص ثورة
ايه كل الانصاص دى ؟
لاء بقي يا كله يا كله
كلنا نازلين .. احنا ماكلناش حاجة عشان نشرب عليها ماية

العتبة الخضرا وللا عتبة الحرية ؟

طول الوقت واحنا شايفين اثره وشاميين ريحته وكل ما حد يتكلم ويقول يا جماعة ده صاحي نرد ونقوله اخرس وللا كلمة صاحى ايه
بس خلاص اهو قدام الكل
صاحي وبيلعب
اذا انت فضلت ف بيتكوا بكرة يبقي انت رضيت لنفسك انك تشتري العتبة الخضرا وانت واعي تماما انه بيتنصب عليك خصوصا وانت شايف النظام اللي طالبت بسقوطه لسه بيلعب
كل اللي نازل ياريت نبعد عن اى مطلب يفرق ما يجمعش

مطالب الكل
1. تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين
2. اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3. حل جهاز الامن المركزي او ادماجه في الجيش
4. اقالة يحيى الجمل ومحاكمة عمر سليمان
5. وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
6. فرض الضريبة التصاعدية
7. محاكمة كافة رجال الاعمال الفاسدين ومصادرة اموالهم
8. الغاء احالة المدنيين الى قضاء عسكري
9. اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
10. حظر فض الاعتصامات بالقوة بشكل كامل
معرفش موقف الجيش ده كويس وللا لأ بس ادينا هنشوف وربنا يستر

4 مايو..فاكرينه ؟

صحيح دنيا دوارة يا حس حس
الهي ما يعيدها أيام
يا ترى اسامة سرايا بيفتكر الكلام اللي كان بيشللنا بيه ده ازاى دلوقت

هتشوفها ازاى ؟؟

لازم تتشاف من تحت لفوق
ملناش اختيار تاني
كل حاجة بتتبني بتتبني من تحت لفوق
الهدم بس هو اللي بيكون من فوق لتحت
لو شفناها من فوق لتحت يبقي بنضيع كل حاجة
وللا ايه ؟؟